തിരുഹൃദയ വണക്കമാസ ജപവും പ്രാർത്ഥനയും: ഇരുപത്തിനാലാം ദിവസം
ജപം
സകല നിക്ഷേപങ്ങളുടെയും ഭണ്ഡാഗാരമായ ഈശോമിശിഹായേ, അങ്ങേ ദിവ്യഹൃദയം മുള്മുടി ധരിച്ചതായി ഞാന് കാണുകയാല് തളര്ന്നു ബോധാരഹിതനാകാതിരിക്കുന്നതെങ്ങനെ? എന്റെ ആയുസ്സും ശരണവും ആശ്വാസവുമായ ഈശോനാഥാ, അങ്ങയെ ഞാന് ആരാധിക്കുന്നു. എന്റെയും ലോകമൊക്കെയുടെയും പാപങ്ങള് അങ്ങേ ദിവ്യഹൃദയത്തെ എത്രമാതം ദുഃഖിപ്പിക്കുന്നു. ഹാ, എന്റെ ഹൃദയത്തിന്റെ സന്തോഷമായ ഈശോതമ്പുരാനേ, ഞാന് മരിക്കുന്നതിനു മുമ്പ് എന്റെ ഹൃദയകണ്ണുനീരാല് എന്നിലുള്ള പാപാശുദ്ധതകളെ കഴുകി അങ്ങേ സന്നിധിയില് കൃപ ലഭിപ്പാന് എനിക്ക് ഇടവരുത്തിയരുളണമേ. ആമ്മേന്.
പ്രാർത്ഥന
കര്ത്താവേ, അങ്ങയുടെ മണവാട്ടിയായ കത്തോലിക്കാ തിരുസ്സഭയ്ക്കു പൂര്ണ്ണസ്വാതന്ത്ര്യം കൊടുത്തരുളേണമേ. ഞങ്ങളുടെ പിതാവായ പരിശുദ്ധ പാപ്പായെ സംരക്ഷിക്കണമേ. എല്ലാവരും അങ്ങയുടെ ഏക സത്യസഭയെ അറിഞ്ഞ് ഏക ഇടയന്റെ കീഴാകുന്നതിന് വേഗത്തില് ഇടവരുത്തണമേ! നിര്ഭാഗ്യ പാപികളുടെമേല് കരുണയായിരിക്കണമേ. അനുഗ്രഹത്തിന്റെ അമ്മയായ പരിശുദ്ധ മറിയമേ, ദിവ്യഹൃദയത്തിന് നാഥേ, ഞങ്ങൾ അപേക്ഷിക്കുന്നതും ആഗ്രഹിക്കുന്നതുമായ സകല വരങ്ങളും അങ്ങയുടെ ശക്തമായ മദ്ധ്യസ്ഥതയില് ശരണപ്പെട്ട് അങ്ങു വഴിയായി ലഭിക്കുമെന്ന് പൂര്ണ്ണമായി ഉറച്ചിരിക്കുന്നു. ആമ്മേന്.
സുകൃത ജപം
മുള്മുടി ധരിപ്പിക്കപ്പെട്ട ഈശോതമ്പുരാൻറെ തിരുഹൃദയമേ, എന്റെ പാപങ്ങളിന്മേല് മനസ്താപപ്പെടുന്നതിന് കൃപ ചെയ്തരുളണമേ
Amen 🙏
ReplyDelete