തിരുഹൃദയ വണക്കമാസ ജപവും പ്രാർത്ഥനയും: അഞ്ചാം ദിനം.
ജപം
എന്റെ രക്ഷകനും സ്രഷ്ടാവുമായ ദൈവമേ! ഗാഗുല്ത്താ മലയില് അങ്ങേ മരണ സമയത്ത് ഞാനും ഉണ്ടായിരുന്നെങ്കില് ഞാന് എത്രമാത്രം ഭാഗ്യവാനാകുമായിരുന്നു! കുന്തത്താല് കുത്തിത്തുറക്കപ്പെട്ട അങ്ങേ തിരുഹൃദയത്തില് നിന്നും ഒഴുകിക്കൊണ്ടിരുന്ന ദിവ്യരക്തം എന്റെ ഹൃദയത്തിലേക്ക് വീണിരുന്നുവെങ്കില് ഞാന് എത്ര പരിശുദ്ധനാകുമായിരുന്നു! മാധുര്യപൂര്ണ്ണനായ ഈശോയേ, ആദ്യബലി ദിവസം ഗാഗുല്ത്തായിലെ കുരിശിന് ചുവട്ടില് നില്ക്കുന്നതിനുള്ള ഭാഗ്യം കിട്ടിയില്ലായെങ്കിലും അങ്ങേത്തന്നെ ദിവ്യബലി പൂജയില് നിത്യപിതാവിങ്കല് കാഴ്ച സമര്പ്പിക്കുന്ന അവസരത്തില്, കുരിശിനു കീഴില് അങ്ങയോടുകൂടി ഉണ്ടായിരുന്നവര്ക്കു ലഭിച്ച അതേ ഭാഗ്യം തന്നെ എനിക്കു ലഭിക്കുമെന്നു പൂര്ണ്ണമായി ഞാന് വിശ്വസിക്കുന്നു. സ്നേഹനാഥനായ എന്റെ ഈശോനാഥാ, കഴിഞ്ഞ ജീവിത കാലത്തില് പരിശുദ്ധ കുർബാനയിൽ അങ്ങയെ ആരാധിക്കാതെയും അങ്ങേ അനന്തമായ സ്നേഹം ഓര്ക്കാതെയും പോയിട്ടുണ്ട് എന്നുള്ളത് വാസ്തവം തന്നെ. ദയാനിധേ, എന്റെ നന്ദിഹീനതയെ വീക്ഷിക്കാതെ അങ്ങേ കരുണയാൽ എന്നോടു ക്ഷമിക്കണമേ. ഇനി അവശേഷിച്ചിരിക്കുന്ന ജീവിതകാലം സാധ്യമായ വിധം പരിശുദ്ധബലികളിൽ അങ്ങയെ ആരാധിക്കാനും, സ്തുതി സ്തോത്രങ്ങള് സമര്പ്പിക്കുവാനും ഞാന് സന്നദ്ധനാണെന്ന് ഇതിനാല് പ്രതിജ്ഞ ചെയ്യുന്നു.
പ്രാർത്ഥന
കര്ത്താവേ, അങ്ങേ മണവാട്ടിയായ കത്തോലിക്കാ തിരുസ്സഭയ്ക്കു പൂര്ണ്ണസ്വാതന്ത്ര്യം കൊടുത്തരുളേണമേ. ഞങ്ങളുടെ പിതാവായ പരിശുദ്ധ പാപ്പായെ സംരക്ഷിക്കണമേ. എല്ലാവരും അങ്ങേ ഏക സത്യസഭയെ അറിഞ്ഞ് ഏക ഇടയന്റെ കീഴാകുന്നതിന് വേഗത്തില് ഇടവരുത്തണമേ! നിര്ഭാഗ്യ പാപികളുടെമേല് കരുണയായിരിക്കണമേ. അനുഗ്രഹത്തിന്റെ അമ്മയായ പരിശുദ്ധ മറിയമേ, ദിവ്യഹൃദയത്തിന് നാഥേ! ഞങ്ങൾ അപേക്ഷിക്കുന്നതും ആഗ്രഹിക്കുന്നതുമായ സകല വരങ്ങളും അങ്ങേ ശക്തമായ മദ്ധ്യസ്ഥതയില് ശരണപ്പെട്ട് അങ്ങു വഴിയായി ലഭിക്കുമെന്ന് പൂര്ണ്ണമായി ഉറച്ചിരിക്കുന്നു. ആമ്മേന്.
സുകൃത ജപം
ഈശോയുടെ മാധുര്യമുള്ള തിരുഹൃദയമേ! അങ്ങയേ എപ്പോഴും സ്നേഹിപ്പാന് എനിക്കു കൃപ ചെയ്യണമേ.
No comments:
Post a Comment
You are Welcome to add your Comments, Opinions, Doubts, Queries and Prayers below. God Bless...!