തിരുഹൃദയ വണക്കമാസ ജപവും പ്രാർത്ഥനയും: ഇരുപത്തൊന്നാം ദിവസം
ജപം
എന്റെ നേരെയുള്ള സ്നേഹത്താല് ജ്വലിക്കുന്ന ഈശോമിശിഹായുടെ ദിവ്യഹൃദയമേ, അങ്ങയെ എന്റെ പൂര്ണ്ണഹൃദയത്തോടെ ഞാന് സ്നേഹിക്കുന്നു. സ്വര്ഗ്ഗത്തില് മാലാഖമാരും പുണ്യാത്മാക്കളും അങ്ങേയ്ക്കു ചെയ്യുന്ന ആരാധനകളും സ്തുതിസ്തോത്രങ്ങളും സ്നേഹപ്രകടനങ്ങളും, ഭൂമിയില് നീതിമാന്മാര് അങ്ങയുടെ ദിവ്യഹൃദയത്തിനു നല്കുന്ന ആരാധനകളും, സല്കൃത്യങ്ങളും എന്റെയും എന്റെ കുടുംബത്തിന്റെയും സഹോദരങ്ങളുടെയും ലോകമൊക്കെയുടെയും പാപങ്ങള്ക്കും, അങ്ങു സഹിക്കുന്ന നിന്ദാപമാനങ്ങള്ക്കും പരിഹാരമായി അങ്ങേയ്ക്കു ഞാന് കാഴ്ച സമര്പ്പിക്കുന്നു. കര്ത്താവേ, അങ്ങയുടെ അളവറ്റ കരുണയാല് ഇവ സ്വീകരിച്ച് ഞങ്ങളുടെമേല് ദയയായിരിക്കണമേ.
പ്രാർത്ഥന
കര്ത്താവേ, അങ്ങയുടെ മണവാട്ടിയായ കത്തോലിക്കാ തിരുസ്സഭയ്ക്കു പൂര്ണ്ണസ്വാതന്ത്ര്യം കൊടുത്തരുളേണമേ. ഞങ്ങളുടെ പിതാവായ പരിശുദ്ധ പാപ്പായെ സംരക്ഷിക്കണമേ. എല്ലാവരും അങ്ങയുടെ ഏക സത്യസഭയെ അറിഞ്ഞ് ഏക ഇടയന്റെ കീഴാകുന്നതിന് വേഗത്തില് ഇടവരുത്തണമേ! നിര്ഭാഗ്യ പാപികളുടെമേല് കരുണയായിരിക്കണമേ. അനുഗ്രഹത്തിന്റെ അമ്മയായ പരിശുദ്ധ മറിയമേ, ദിവ്യഹൃദയത്തിന് നാഥേ, ഞങ്ങൾ അപേക്ഷിക്കുന്നതും ആഗ്രഹിക്കുന്നതുമായ സകല വരങ്ങളും അങ്ങയുടെ ശക്തമായ മദ്ധ്യസ്ഥതയില് ശരണപ്പെട്ട് അങ്ങു വഴിയായി ലഭിക്കുമെന്ന് പൂര്ണ്ണമായി ഉറച്ചിരിക്കുന്നു. ആമ്മേന്.
സുകൃത ജപം
നിത്യപിതാവായ ദൈവമേ, എന്റെയും ലോകമൊക്കെയുടെയും പാപങ്ങള്ക്കു പരിഹാരമായി അങ്ങയുടെ ദിവ്യപുത്രന്റെ തിരുരക്തത്തെ അങ്ങയ്ക്ക് ഞാന് കാഴ്ച സമര്പ്പിക്കുന്നു.
