തിരുഹൃദയ വണക്കമാസ ജപവും പ്രാർത്ഥനയും: മുപ്പതാം ദിവസം (JUNE - 30)
ജപം
ഈശോമിശിഹായുടെ കൃപ നിറഞ്ഞ ദിവ്യഹൃദയമേ, അങ്ങയെ ഞാന് ആരാധിക്കുന്നു. പൂര്ണ്ണഹൃദയത്തോടെ സ്നേഹിക്കുന്നു. കര്ത്താവേ, അങ്ങയുടെ മാധുര്യം നിറഞ്ഞ ഹൃദയം അങ്ങയുടെ മാതാവായ പരിശുദ്ധ കന്യകമറിയത്തെ സ്നേഹിക്കുന്നതുപോലെ, ഈ അമ്മയെ ബഹുമാനിക്കുന്ന ആത്മാക്കളെയും അതിവാത്സല്യത്തോടെ സ്നേഹിക്കുന്നുവെന്ന് അറിയുന്നതില് മഹാപാപിയായ ഞാന് അത്യന്തം സന്തോഷിക്കുന്നു. അങ്ങയുടെ പരിശുദ്ധ അമ്മയുടെ അപേക്ഷയെ അങ്ങ് ഒരിക്കലും ഉപേക്ഷിക്കായില്ലായെന്ന് അങ്ങുതന്നെ എന്നെ പഠിപ്പിച്ചിരിക്കയാൽ, എന്റെ ശരണം മുഴുവനും ഈ അമ്മയില് വയ്ക്കാതെയിരിക്കുന്നതെങ്ങനെ? സ്നേഹം നിറഞ്ഞ ഈശോനാഥാ, എന്റെ ജീവിതകാലത്തില് അങ്ങയുടെയും അങ്ങയുടെ പരിശുദ്ധ ജനനിയുടെയും സ്നേഹത്തില് നിലനിൽപ്പാനും, അങ്ങയുടെ വളര്ത്തു പിതാവായ മാര് യൗസേപ്പ് നിങ്ങളുടെ തൃക്കരങ്ങളില് തന്റെ നിർമല ആത്മാവിനെ കയ്യേല്പ്പിച്ചതുപോലെ “ഈശോ മറിയം യൗസേപ്പേ, നിങ്ങളുടെ തൃക്കരങ്ങളില് എന്റെ ആത്മാവിനെ കയ്യേല്പ്പിക്കുന്നു” വെന്ന് ചൊല്ലി നിങ്ങളുടെ തിരുനാമങ്ങള് മനസ്താപത്തോടും സ്നേഹത്തോടും കൂടെ ഉദ്ധരിച്ച് എന്റെ ഈ ലോകജീവിതം അവസാനിപ്പിക്കുന്നതിനും കര്ത്താവേ എനിക്കു ഇടവരുത്തിയരുളണമേ.
പ്രാർത്ഥന
കര്ത്താവേ, അങ്ങയുടെ മണവാട്ടിയായ കത്തോലിക്കാ തിരുസ്സഭയ്ക്കു പൂര്ണ്ണസ്വാതന്ത്ര്യം കൊടുത്തരുളേണമേ. ഞങ്ങളുടെ പിതാവായ പരിശുദ്ധ ... (ലെയോ) പാപ്പായെ സംരക്ഷിക്കണമേ. എല്ലാവരും അങ്ങയുടെ ഏക സത്യസഭയെ അറിഞ്ഞ് ഏക ഇടയന്റെ കീഴാകുന്നതിന് വേഗത്തില് ഇടവരുത്തണമേ! നിര്ഭാഗ്യ പാപികളുടെമേല് കരുണയായിരിക്കണമേ. അനുഗ്രഹത്തിന്റെ അമ്മയായ പരിശുദ്ധ മറിയമേ, ദിവ്യഹൃദയത്തിന് നാഥേ, ഞങ്ങൾ അപേക്ഷിക്കുന്നതും ആഗ്രഹിക്കുന്നതുമായ സകല വരങ്ങളും അങ്ങയുടെ ശക്തമായ മദ്ധ്യസ്ഥതയില് ശരണപ്പെട്ട് അങ്ങു വഴിയായി ലഭിക്കുമെന്ന് പൂര്ണ്ണമായി ഉറച്ചിരിക്കുന്നു. ആമ്മേന്.
സുകൃത ജപം
തിരുഹൃദയത്തിന് നാഥേ, ഞങ്ങള്ക്കു വേണ്ടി അപേക്ഷിക്കണമേ.
